Мин төрөппүттэрим

 

Мин төрөппүттэрим бэйэлэрин кэмнэригэр олус үлэһит дьон этилэр. Өрүү үлэ үөһүгэр сылдьыбыттара, элбэх оҕолоох дьиэ кэргэн этилэр. Мин аҕам Филиппов Абрам Тимофеевич, Өлүөхүмэ оройуонугар 1 Нөөрүкээйи нэһилигэр, 1924 сыллаахха алтынньы бастакы күнүгэр төрөөбүтэ, ус оҕолоох дьиэ кэргэҥҥэ саамай кыралара эбит. Сэттэ кылаас үөрэхтээх. Аҕа дойду сэриитэ саҕаланарыгар 17 саастаах эрэ эбит, ол иһин1944 сыллаахха армияҕа ыҥырыллан,  Японияны кытта сэриигэ кыттан, радииһынан сылдьыбыт. Сэриттэн этэҥҥэ эргиллэн кэлэн, партийнай үлэһит буолан, партия ханна ыытар да баран ситиһиилээхтик үлэлиир этэ. Кэнники сылларга » Холбос» салаатынан өр сыл үлэлээн пенсияҕа тахсыбыта. Сэрии, үлэ ветерана.
Ийэм Филиппова Феоктиста Ивановна, Өлүөхүмэ оройуонугар, Кээччи нэһилиэгэр 1929 сыллаахха, тохсунньу 15 күнүгэр төрөөбүтэ, элбэх оҕолоох дьиэ кэргэнигэр. Аҕа дойду сэриитэ саҕаланарыгар 12 саастаах эбит, оонньоботох оҕо сааһа сэрии кэмигэр ааспыт. Улахан дьону кытта тэҥҥэ үлэлэһэн улаппыт. Биһиги дойдубутугар  оччотоҕуга бурдук ыһар буоланнар, үксүн ити үлэҕэ сылдьыбыт. Кэлин, сэрии кэнниттэн, улаатан баран нэһилиэгэр активистка буолан, Кээччитээҕи первичнай комсомольскай ячейкаҕа секретардаан, эдэр ыччаттары көҕүлээн илдьэ сылдьыбыт. Үлэтигэр олус бэриниилээх буолан, үрдук ситиһиилээхтик үлэлээбит. Бурдук ыһыытыгар үрдук ситиһиилэнэн  Ярославскай музейга үлэтин ситиһиитин туһунан  выставка5а тахсыбыт уонна ВДНХ- ҕа путевка биэрэннэр, Москаҕа баран кэлэр. Кини үлэ, тыыл бэтэрээнэ , элбэх оҕолоох ийэ, биһиги сэттэ бииргэ төрөөбүппүт, бары дьон тэҥинэн үлэһит буола сылдьабыт. Мин бэйэм төрөппүттэрбинэн киэн туттабын, кинилэр баар буолан биһиги- оҕолоро күн сирин көрөн, бу орто дойдуга олорон, үлэлээн-хамнаан, кинилэр туйахтарын хатаран, эмиэ үлэ бэтэрээнэ  буоллубут.
Биһиги төрөппүттэрбит көлүөнэлэрэ, ыстаал хатарыллыбытын курдук, кытаанах санаалаах, ыараханы тулуйар хорсун дьоннор этилэр. Биһиги олохпут тупсарыгар илиилэрин араарбакка үлэлээн дойдубут сайдыытыгар өҥөлөрө муҥура суох, ол иһин, урут да, билигин да, бэйэлэрин  дойдуларыгар, холобур буолаллара.

Читайте также:  Еникеев Ахтям Рахманович

 

Ахтыыны суруйда кыыстара  Филиппова Ариадна Абрамовна