Алексеева Мария Ивановна — ахтыы

 

Биһиги ийэбит, эбээбит, хос эбээбит үлэ, тыыл бэтэрээнэ Алексеева Мария Ивановна 1930 с. Хорула нэһилиэгэр төрөөбүтэ.

Быраатынаан Алексеев Иван Ивановичтыын уоттаах сэрии сылларыгар кыра саастарыгар төгүрүк тулаайах хааланнар, ийэбитин аймахтара илдьэ сылдьан улаатыннарбыттара.  Быраата Иван детдомҥа иитиллэн улаатан, кэлин ыал буолан 5 оҕону төрөтөн Ньурбаҕа олохсуйбута, промкомбинакка столярдыы сылдьан эдэр сааһыгар ыалдьан өлбүтэ.

Ийэбит 1948 с. абаҕата Алексеев Роман Кириллович Хаҥалас маҕаһыыныгар атыыһыттыы кэлбитигэр, кини дьиэ кэргэнин кытары көсүһэн кэлэн, биһиги аҕабытыгар Романов Василий Никитичкэ кэргэн тахсан, Хаҥалаһы икис дойду оҥостон олохсуйа хаалбыта.

“Сууттааҕынан”, “Оҕус охтубутунан” субай сүөһү көрүүтүгэр, арыы собуотугар рабочайынан, онтон 30-ча сыл “Ынахсыт” ферматыгар ыанньыксытынан үлэлээбитэ.

Урукку ыанньыксыттар үлэлэрэ барыта илии үлэтэ буолара. Сарсыарда 5-6 чаастан биир өрөбүлэ суох ынах ыаһына, от таһыыта, эбиискэ сиэтээһинэ, төрүүр ынах манааһына, ньирэй көрүүтэ, күннэрин хотоҥҥо барыыллара. Фермаҕа өр сылларга Алексеева Федора Егоровнаны, Филиппова Мария Федотовнаны, Варвара Тимофеевна, Семен Терентьевич Васильевтары кытары бииргэ үлэлээбитэ. Үлэлээбит кэмнэригэр үчүгэй үлэтин иһин грамоталарынан, харчыннан элбэхтэ бириэмийэлэнээччи.

Пенсияҕа тахсан да баран фермаҕа итии аһылык поварынан, харабынайынан хойукка диэри үлэлээбитэ.

Дьоммут аҕыс оҕоломмуттара. “Материнская слава II степени” мэтээллээх этэ. Эрдэ огдообо хаалан үлэлээн-хамнаан биһигини иитэлээн атахпытыгар туруорбутугар ийэбит барахсаҥҥа махталбыт муҥура суох. Биһиги библиотекарь, бэтэринээр, медик идэлэммиппит, сорохторбут “Марха” совхоз туруу үлэһиттэрэ буолбуттара. Ийэбит элбэх сиэни бүөбэйдээн илиитин сымнаппыта.

Читайте также:  Пестрякова Мария Николаевна

Баҕарар баҕа санаата – сэрии эрэ буолбатын, дьон бары дьоллоохтук үөрэ-көтө олордуннар, сиэннэрим улаатан үөрэхтээх дьон буолан араас идэни баһылаатыннар диэн этэ. Эбээлэрин баҕатын толорон сиэттэрэ юрист, медик, педагог, архитектор, автомеханик, горняк идэлээхтэр. Хос сиэттэрэ оскуола, детсад дьоно.

Күндү киһибит, тапталлаах ийэбит Алексеева Мария Ивановна 1999 сыллаахха тохсунньу 27 күнүгэр ыалдьан олохтон туораабыта. Ийэбит, эбээбит туһунан сырдык өйдөбүл сүрэхпитигэр өрүү тыыннаах.

 

Ньурбаттан, Мэҥэ-Хаҥаластан оҕолоро, сиэннэрэ, хос сиэннэрэ.