Дьонугар суруга

1942 с. тохсунньу 1 күнэ.

Ытыктыыр дьонум бары дорооболоруҥ!

Ыам ыйыгар үлэлиир сирбэр кэлэн баран суруйбутум уонна эһигиттэн сурук күүтэ сырыттахпына сэрии буолбута. Мин фроҥҥа бэс ыйын 24 күнүгэр кэлэн баран от ыйын 1 күнүгэр диэри 5 төгүл штыковой атаакаҕа сырыттым. Кэнники от ыйын 1 күнүгэр миигин буулдьанан бааһырпыттара. Бэйэм кыайан турбакка сыттахпына, кыһыл армеецтар булан санитарнай массыынаҕа олорпуттара, ол кэнниттэн тугу да өйдөөбөккө сытан баран, от ыйын 10 күнүгэр X куоракка госпиталга кэлэн арыычча буолбутум.
Врачтар үчүгэйдик оһуоҥ дииллэр. Онон куттанымаҥ, долгуйа олорумаҥ. Эһиги бүттүүҥҥүт көҥүллүк уонна үчүгэйдик олороргут иһин эһиги уолгут хаанын тоҕон туран охсуспутуттан үөрүөх тустааххыт. Нэһилиэгим бары дьоннорун аатыгар суруйуохпун баҕарабын да күүһүм олус кыра, өр тулуйан олорбоппун.
Бааһым остор эрэ фашистары утары өссө охсуһа барыам.
Немец хааннаах ыттарын сир сирэйиттэн киэр эһиэхпит.
Доруобай буолуҥ!

Хааллым эһиги уолгут Егор Баланов.

«Коммунист» хаһыат /БСК/б/П Таатта оройуонунааҕы комитетын уонна Үлэһиттэр депутаттарын оройуоннааҕы Советын органа/, 1942 с. тохсунньу 1 күнэ.

«САЛААТТАР СУРУКТАРА», 1970, Якутск, Д.Петров