Оонньоммотох оҕо саас

Аан дойдуну аймаабыт,элбэх киһи өлүүлээх Аҕа дойду сэриитэ түөрт уһун сыл устата барбыта.Биһиги Ийэ дойдубутугар иэдэннээх алдьархайы ,урусхалы,харах уутун аҕалбыта.Төһөлөөх элбэх киһи сэрии толоонугар,тыылга аччыктаан суорума суолламмыта буолуой,төһөлөөх эрэйи-муҥу көрбутэ буолуой…Мин эбэм,Егорова Мария Ивановна,Хаҥалас нэһилиэгэр Сууттаах диэн алааска Бокуруоп күн-алтынньы 14 күнүгэр-күн сирин көрбүт.Олох кыратыгар төрөппүт аҕата өлөн,ийэтин Дьэбдьиэйи кытта дьадаҥы эһэтин ааҕынан дьукаахтаһан олорон айахтарын ииттиммиттэр. Ол кэнниттэн оҕолор курдук кыратыттан үлэҕэ сыстаҕас эбит.Хотоҥҥо ынах ыылларыгар тымтык тутааччы,тарбыйах этиттэрээччи,суорунаҕа туорах бурдук тартарар эбит.Ол бурдуктан оҥоһуллубут алаадьы,лэппиэскэ олус да минньигэс буолар эбит.Оскуолаҕа киирэн үөрэнэн иһэн,үөрэҕин тохтоппут.
Фашисткай Германия биллэриитэ суох сэриинэн саба түһэр,таайдара сэриигэ бараллар.Ийэтин,улахан эдьиийин Евдокия Романовнаны  кытта тыылга ыарахан үлэттэн толлубакка тэҥҥэ үлэлэһэр.Сэрии иккис сылыгар ийэтэ өлөн,13 саастааҕар тулаайах хаалар.Киһи буолуох быатыгар,үчүгэй салайааччы Ылдьаа Кутанов баар буолан,улахан сутааһыны билбэккэ ,биир да киһи хоргуйбакка Кыайыы күнүн  эдьиийин кытта көрсүбүттэр.Бу уһун түөрт сыл устата,эбэм барахсан сэрии ыар тыынын — аччыктааһыны,тоҥууну,үлэ ыараханын,дьон хаҕыс да,амарах сыһыанын кыра дьарамай санныгар сүгээхтээбит.Эбэм  Иосиф Сталины таҥара курдук саныыра,»Кини салайан сэриини кыайбыппыт» диэн кэпсиирэ.Таайдара сэрии хонуутуттан эргиллибэтэхтэрэ,сураҕа суох сүппүттэрэ.Эйэлээх олох саҕаланан эбэм ыал буолан,кырдьаҕас эдьиийин Евдокия Романовнаны бэйэтин кытта илдьэ олордор.Үөрэҕэ суох эһээбэр хаһыат сонуннарын доргуччу ааҕан иһитиннэрэр эбит,киэһээҥҥи аһылык кэннэ кыргыттарын кытта хабылыкка,дуобакка оонньуурун сөбүлүүр этэ диэн ийэм сөҕө кэпсиир.Саха дьахтарын сиэринэн,иис бөҕөтүн иистэнэр,сымнаҕас алаадьытын,лэппиэскэтин,суохтуур ахан.Эбэм барахсан саҥа үйэҕэ үктэнэн баран,күн сириттэн барбыта.
Иллээх-эйэлээх олоххо олорорбутугар,саа-саадах туппатах да буоллар,оонньоммотох оҕо саастаах биһиги эбээлэрбит-эһээлэрбит барахсаттар өҥөлөрө баар,ол туһунан биһиги хаһан да умнуө суохтаахпыт!!!

Читайте также:  Ефремов Максим Егорович

Егорова Мария Ивановна

 

      «Ыллык» эдкорпост кэриспэндиэнэ
Адамов Олег. Ньурба,Хаҥалас