Васильев Семен Иванович

0
63

Васильев Семен Иванович           

Аҕабыт, эһэбит Ханалас нэьилиэгэр Миитэкэ алааһыгар 1933 с. Уйбаан уонна Аана Васильевтарга күн сирин көрбүт.

Эһэбит улуу уоттаах сэрииттэн төннүбэтэҕэ, сураҕа суох сүппүтэ, ийэтэ Аана 7 оҕолоох хаалбыта.

Сэрии кэминээҕи хоргуйуу, ыарахан үлэ Аананы уонна 3 оҕотун илдьэ барбыттара. 4 оҕо тулаайах хаалбыта. Кэлин Мааппа диэн эдьиийдэрэ өлбутэ.

Аҕабыт тулаайах хаалан баран 10 саастааҕар «Коммунизм» холкуоһугар улэлээн барбыта. Бастакы от уонна ыҺыы хомуур кэмигэр ат, оҕус сиэтэрэ. 14 сааһыттан косилканан от охсоро, аҕабытын Куочай детдомугар үөрэттэрэ илдьибиттэрин тэһийбэккэ аҕыйах ый үөрэнээт төннөн кэлбит.

Сэрии ыар кэмнэригэр «Коммунизм» холкуос бэрэссэдээтэллэринэн Григорьев Николай, Романов Данил Гаврильевич үлэлээбиттэрэ.  Аҕабыт ылбаҕай, сүрэхтээх үлэһит буолан хайҕабылга сылдьара, тулаайах уолу бары аһыналлара, туох астаахтарынан аһаталлара, Николай Григорьев куруук оҕотун курдук көрө–истэ,өйүү сылдьыбытын өрүү  махтанан ахтара.

Кэлин аҕабыт субай сүөһү көрүүтүгэр фермаҕа бостуугунан, звеноводунан, ат көрөөччүнэн пенсияҕа тахсыар диэри үлэлээбитэ. Кини салайар звенота былаанын аһара толорон, куоталаһыыга бастаан биэрэн, харчынан, грамотанан, наҕарааданаллара.

1988 сыллаахха пенсияҕа тахсан баран, 1994 сылга диэри совхоһугар, онтон холкуоһугар харабынайынан  үлэлээбитэ.

1959 сыллаахха Александра Тимофеевналыын ыал  буолбуттара, уон оҕону төрөтөн, иитэн олох киэн  аартыгар  үктэннэрбиттэрэ .

Биһиги  аҕабыт

Читайте также:  Филиппов Михаил Прокопьевич

 Биһиги айбыт аҕабыт Васильев Семен Иванович, ийэбит Герой ийэ Иванова Александра Тимофеевна. Аҕабыт тулаайах хаалан убайын, быраатын, кытары улааппыттар. Аҕабыт хара улэҕэ илиитинэн үлээлээбит буолан барыны бары сатыыр этэ. Совхоз эрдэҕинэ Ойбон Көлүйэ гэ сүөһү олорор этилэр, онно Семенов Василий диэн Маар киьитэ эт тутан приемщиктыыра, аҕабыт онно харабынайынан үлэлээбитэ. Аҕабыт биир сыл ыалдьан операцияҕа барбыта. Ийэбит, мин начальнай кылааска үөрэнэр быһыылаах этим ону наһаа өйдүүбүн, маҕаьыын котельнайыгар кочегаардаабыта. Мин эдьиийим Галяны кытары ийэбит хонор күнүгэр балтыбытын көрөр этибит. Уон оҕону аһатыан ,таҥыннарыан наада буоллаҕа дии, ол иһин үлэлии киирдэҕэ дии. Аҕабыт операцияттан  кэлбитигэр үөрүү-көтүү бөҕө буолбуппут. Ийэбит кэлин кулуубка остуораһынан киирбитэ. Биьиги кыргыттар онно кулуубу сууйсан, үлэлии үөрэммиппит. Мин бэйэм өйдүүрбүнэн үһүск кылаастан сууйсубутум кулуубу.

Ийэбит барыбытыгар истээх баккы батинынан баатанан тигэн кэтэрдитэлиир этэ, олус ичигэс буолааччы. Платьялары эмиэ тигээччи.  Баттахпытын    тараан, өрөн оскуолаҕа ыытар этэ. Аҕабыт аттаах этэ, онон саһаанныы,оттуу барсааччыбыт. Атынан улахан багайы хоптоҕо муус тиэйэн аҕалар этэ. Сайын сир аһа үүннэҕинэ, дьэдьэн үргээн кэлэрэ, бу буспут диэн көрдөрөр этэ.

Мин 1986 сыллаахха ыал буолбутум Сунтаар улууһун Кундэйэ бөһүөлэгэр. 1988 сылга  сана дьиэбитигэр киирбиппит. Ол кэннэ аҕалаах ийэм төрөөрү сылдьар ынаҕы биэрбиттэрэ. Ону кэргэним Балыарый массыынаннан тиэйэн аҕалан сүөһү төрдө гынан сүөһүлэммиппит. Онтубут икки дуу үс дуу хоноот төрөөбүтэ. Ол күнтэн ыла билиҥҥэ дылы сүөһү диэни билэн, ииттэн олоробут. Ийэбит тугу сатаабатагай барыны-бары сатыыр этэ, асчыта-иистэнньэҥэ, сууйара, соторо барыта ып – ыраас этэ. Биһиги дьиэбитигэр тоһолоох элбэх киһи киирэн ааспыта буолуой. Ийэбит остуола мэлдьи аһа дэлэйэ минньигэһэ, тобус толору буолар этэ. Күндэйэм дьонноро ааьан иһэн чаайдаан ааспыт дьоннор элбэхтэр, наһаа үчүгэйдик саныыллар, кэпсииллэр, онон дьоммунан киэн туттабын. Аҕам ийэм үлэһит дьон буоланнар мин кинилэртэн үөрэнэн үлэһит буолан, пенсияҕа тахсан сүөһүбүтүн көрөн олоробут. Түөрт оҕолоохпун, алта сиэннээхпин.

Читайте также:  Васильева Розалия Григорьевна

Кыыһа  Елисеева Зинаида Семеновна ахтыытыттан.