Васильев Семен Павлович

0
124

 

Васильев Семен Павлович (Быһырыакап)

 

Сэрии иннинэ Орджоникидзе колхозка үлэлии сырыттаҕына 1942 сыллаахха бэбиэскэ туппута. Кини күүһүн-уоҕун үгэнигэр сылдьара, үрдүк уҥуохтаах, сиппит курдук толору эттээх-сииннээх, нэһилиэктэр ыһыахтарыгар сылдьан элбэхтик хайҕаммыт, бирииһи да ылбахтаабыт киһи этэ. Семен Уралга Молотов куоракка саппаас полкаҕа байыаннай дьыалаҕа үөрэнэн баран, Калининскай фроҥҥа алтынньы ый бүтэһигэр, 1942 сыл танковай пулемет 2-c нүөмэринэн сэриигэ кыттыыны ылбыта. Фроҥҥа сылтан ордук сылдьыбыт кэмигэр иккитэ бааһыран II группалаах инбэлиит буолан дойдутугар 1944 сыллаахха сайын тиийэн кэлбитэ. Ити сылтан ордук кэмҥэ араас быһылааннаах түгэннэргэ түбэһитэлээбитин, хорсуннук да сэриилэспитин кэпсиирэ. Олортон биир маннык түгэни кини умнубат эбит.

«1944 сыллаахха муус устар ыйга Сэмэн Ярославль куоракка 2 ыйга госпитальга сытан эмтэнэн баран Смоленскай туһаайыытынан фроҥҥа кэлэн оборонаҕа олорбуттар. Биир түгэҥҥэ өстөөх күүстээх артиллерия ытыалааһынынын кэнниттэн, кинилэр сытар туһаайыыларынан кимэн киириитин саҕалыыр. Элбэх танкалары хаххаланан өстөөх пехотата уоту аһан бу чугаһаан кэлэр.

Семен аттыгар ручной пулеметунан ыта сыппыт саллаат өлбүтүн көрөн, траншеянан сүүрэн тиийэн ол пулеметунан өстөөх утары уоту аһан немецтэр чугуйарга күһэллэллэр. Кылгас тохтобул кэмигэр Семен доҕоро саллааттыын пулеметтарын иитэн бэлэмнэнэллэр. Бу бириэмэҕэ рота командира старшай лейтенант кэлэн, Семену кууһан ылан сыллаабыт, хантан кэлбитин туоһуласпыт уонна барарыгар: «так держать, рядовой Васильев, молодец!» — диэбит.

Читайте также:  Егоров Тимофей Ефимович

Ити кыргыһыыга Семен икки чааһы тохтоло суох өстөөх атаакатын хардары охсуһан немецтэргэ элбэх сүтүгү онорбут. Ол эрэн бэйэтэ улаханнык бааһыран өстөөх буулдьата хаҥас хараҕар түһэн курдаран хаҥас кулгааҕын аннынан тахсар. Семен хас да госпиталларга уларытан эмтэнэн 1944 сыл сайын дойдутугар инбэлиит буолан эргийэн кэлэр.

Семен Павлович сэрииттэн кэлээт колхозка оттон Марха совхозка үтүө суобастаахтык үлэлээбитэ. Кини рак ыарыыттан 1975 сыллаахха өлбүтэ. Сэмэн аатын ааттатыах кэннигэр хаалбыт ыччата суох.

Николаев А.И.