Чугас дьонугар,. билсэр бары колхозтаахтарыгар суруга

1941 с. ахсынньы 16 күнэ.

Дорооболоруҥ!
Дьэ туох сонун, кэпсээн баарый? Ыаллар хайдах олороллоруй? Сүөһү-ас хайдах турарый? Үлэ-хамнас хайдах барарый? Тугу бултаан-астаан аһыыгыт? Миэхэ сонун диэн соччо суох, доруобуйа, сылдьыы кэминэн үчүгэй. Манна күн аайы байыаннай үөрэхтэн атыны тугу да билбэппит. Урут колхоз үлэтэ ыар, дьиссипилиинэ кытаанах диирбит, ол сыыһа толкуйдуурбутуттан этэр эбиппит. Колхоз үлэтин саҕа чэпчэки суох эбит…
Биһиэхэ аармыйа устааба халбаҥа суохтук толоруллар, ону бэйэҕит билэҕит.
Дьэ, дойдуну ахтыы баар диэххэ сөп, киһи көтөхтөрбүккэ, дьүдэйбиккэ дылы, ол да буоллар сүрэх-быар холку, кытаанах, онон баҕар эргийэн тиийиллиэ.
Үлэни-хамнаһы үчүгэйдик ыытан, өҥнүк-тоттук олоруҥ, доруобайдык-чэбдиктик сылдьан, дьоллоох олоҕу айсыҥ.
Тиийдэххэ күүс, көмө буолуом дии саныыбын,олус таптаабыт колхоһум, ол хаһан да умнуллуо суох. Дьонун-сэргэтин олус таптыыбын, чиэстиибин, онон барыларын ахта саныырга дылыбын.
Дьэ, бары быраһаайдарыҥ!
Илии үрдүгэр ыксалынан суруйдум.

Курилкин.

Кэргэнигэр суруга
1942 с. олунньу 9 күнэ.

Мин ааппыттан итии тыллаах, күндү кэргэннии быһыынан суруллар суругу тут. Мин сылдьыым, доруобуйам кэминэн үчүгэй, арҕаа туһаайыыга айаннаан тиийдибит. Москваны хоту өттүнэн ааһан 33 армияҕа Смоленскай туһаайыыга эбэтэр Белоруссия арҕаа уһугар кэллибит. Хайыһар ротатыгар анаатылар, атахпынан киирэбин диэн көрдүм да, үөрэниэҥ дииллэр, урут биир күн үөрэммитим.
Манна урут сэрии буолбут сирэ, оо дьэ, икки өттүттэн кыргыһыы буолбут сирин көрдөххө, толоос. Буомбалыыр тыас иһиллэр. Фроҥҥа сарсын барбатахпына, аҕыйах хонугунан барабын.
Дьэ, атын сонун суох. Арай Бурцев Александр Ег-һы көрүстүм, сэриигэ иккитэ сылдьыбыт, бааһыран баран үтүөрбүт, фроҥҥа баран иһэр. Ховров Дмитрий, Григорий, Анна, Николай 1, Гоголев Гав. Г., Матрена, Курилкин Петр Ник-вич миигиттэн привет ыллыннар, бу суругу ааҕан биэр. Күндү доҕотторум бука бары быраһаайдарыҥ! Мин аадырыспын суруйбатым: биир сиргэ олохсуйан аны тохтонуллубат.
Сонуну эһиги сотору «Кыым» хаһыаттан үгүстүк билсэргит буолуо.
Дьэ Марпыыһа, үс хонуктааҕыта түүл көрдүм: остуолга тахсан баран дэлби түһэн иһэн өрөһүммүтүгэр олус үөрдүм уонна уһуктан баран, көрбүт киһи курдук, көтөҕүллэргэ дылы буоллум.

Суруйдум Курилкин В. Н.

Бу суруктары Уус-Алдан райисполкомун үлэһитэ Н. С. Пестряков уонна В. Н. Курилкин дьоно уура сылдьаллар.

В. Н. Курилкин Уус-Алдан оройуонугар Хоро нэһилиэгэр төрөөбүтэ. Сэриигэ барыан иннинэ «Куотука» колхоз чилиэнэ этэ. 1942 с. кыһын Смоленскай уобаласка сэриилэспитэ. 222-с стрелковай дивизия састаабыгар сылдьыбыта. Сэрииттэн эргиллибэтэҕэ.

«САЛААТТАР СУРУКТАРА», 1970, Якутск, Д.Петров